🎤言語治療
分享者：言語治療師 楊川
📍言語治療是甚麼？
我哋嘅工作主要分為對成人同對細路仔，成日都話言語治療嘅服務對象係由0歲去到100歲。
細路仔的話，我哋主要會關注佢哋語言方面嘅發展，包括對語言嘅理解同埋表達，發音、聲線，說話流暢度。如發現小朋友出現咗困難，影響嘅溝通，甚至無法滿足生活需求，如學習、社交等，咁我哋就會介入，治療、提供諮詢同轉介等等。
大人的話，我哋會集中吞嚥方面，對象多數係中風病人、腦退化、柏金遜症、腦癱、癌症病人等等 (太多未能詳列)。我哋會檢查口肌同吞嚥功能，確保佢哋食得安全。
我哋都會為一啲失語症病人 (腦部語言區域受損) 及有神經性構音障礙 (因為神經系統受損而導致發音同聲線出現問題) 嘅病人做訓練，跟進介入。
言語治療嘅工作範圍其實好廣，不同機構嘅服務都唔同，但大致上都係同溝通和吞嚥有關。簡單嚟講就係頸上面嘅嘢我哋會比較熟悉，包括病理同治療方法。呢啲都係技術層面上嘅嘢。對我嚟講，治療師的工作不單介入同治療，更加係陪伴同成長。
📍有咩言語治療嘅個案例子？
我喺學校有一個小朋友，第一次同佢見面時，佢整個評估過程一句聲都無出過。後來從老師和家長口中得知，佢原來之前喺被校園欺凌，所以失去咗對人嘅信任。媽媽話佢自此之後就完全冇晒同人建立關係嘅動機，去到邊都唔想講嘢。自己鍾意唔鍾意、開心唔開心，都唔會同人講。媽媽因為擔心佢，周圍帶佢去做評估，有人話佢係自閉症，有人話佢係選擇性緘默，佢亦曾經被診斷為嚴重的語言障礙。佢身上有好多好多標籤，曾經做過好多「治療」同「訓練」，不過成效不大，因為佢「任性，唔肯講嘢」。
對住粒聲都唔肯出嘅同學，我冇好似平時嘅訓練咁，要求佢講好多好多嘢，反而每次都預備一啲遊戲同佢玩，同佢一齊上網睇下佢有興趣的影片 (通常都係打機)。佢想講我就會聽，好似個樹窿咁。我想俾佢知道其實有人係在乎佢鍾唔鍾意、想唔想、有人會肯陪佢，無論佢做得好定唔好，藉此建立返對人嘅信任。
好神奇嘅係，經過一年幾嘅時間，佢每一堂都俾之前講更加多嘢，更加願意分享感受。雖然隔住口罩，我都見到佢笑多咗。記得由初初一粒聲都唔出，到每次見到我都會「講秘密、講心事」嘅轉變，嗰份感動實在難以言喻。成日都覺得我嘅工作係 more than 一份工作，當中嘅滿足感真係好大好大，尤其當要應付呢啲有挑戰性嘅case。
📍求助方法
其實坊間都有好多私人機構同埋非牟利嘅機構 (如: 明愛、保良局、協康會等等)有提供言語治療服務俾學前嘅小朋友，家長如果懷疑小朋友有語言方面嘅需要，都可以直接去接觸呢啲機構查詢佢哋嘅服務。另外，如果小朋友係讀緊幼稚園，老師發現佢可能有語言方面嘅困難，或者有其他特殊學習需要嘅話，都可以轉介去到母嬰健康院或者兒童體能智力測驗中心接受進一步嘅評估，評估完之後就會有適當嘅跟進。而當小朋友去到小學同中學嘅時候，亦都會有駐校嘅言語治療師負責提供服務，家長如果覺得孩子有需要，可以向小朋友就讀嘅學校提出。
📍給學生/家長的Tips
及早識別同及早治療對有語言障礙嘅兒童非常重要。研究發現，小朋友嘅語言發展黃金期通常喺0-6歲。小朋友如果喺語言方面出現困難，越早發現、越早能提供介入和訓練嘅話，治療效果越好。
我本身係駐校言語治療師，見到有啲小朋友錯過咗語言發展嘅黃金期，大大影響咗小學階段嘅學習，都覺得好可惜。尤其當去到小學，會學習比較抽象嘅知識，對小朋友嘅語言需求亦開始越嚟越高。如果語言水平支持唔到學習，就會影響知識增長同學業表現。
另外，語言落後亦對小朋友與同輩嘅相處或者溝通有負面嘅影響。長遠或令自我形象低落，欠缺自信心，損害身心發展。
所以，語言發展對一個兒童的成長和精神健康影響深遠，家長如果發現或懷疑自己的小朋友語言理解和表達出現困難，建議盡快找專業的言語治療師做評估和跟進。
-
如果你有關於SEN嘅經歷，
如果你對SEN有想法，
歡迎到SEN信箱投稿！！link in bio🔗
-
𝔸𝕝𝕝 ℕ𝕠𝕣𝕞𝕒𝕝, 𝕎𝕖 𝔸𝕣𝕖 𝔸𝕝𝕝 𝕊𝕡𝕖𝕔𝕚𝕒𝕝▫️
Comments